«Ұстаз аты мәңгілік, жадымда қалар жаңғырып» ұстаздар күніне арналған әдеби- сазды бағдарлама

«Ұстаз аты мәңгілік, жадымда қалар жаңғырып»

Ұстаздар күніне арналған мерекелік бағдарлама

1-жүргізуші: Арман

Жайна білім ордасы бақ талабым,

Өзің үшін талай сыр ақтарамын.

Сен бергенсің білімнің кәусар нәрін,

Сен айырттың арасын ақ- қараның.

Сен аянбай ерледің ақ таң үшін,

Бізге арналды сан жылғы ақтарысың.

Сенсің Ордам білімнің шат бесігі,

Сенсің менің мектебім мақтанышым.

2-жүргізуші: Ділдә

Бүгін мектебімізде үлкен мереке. Бүгін ұстаздар қауымының төл мерекесі. Олай болса бүгінгі күн ұстаздарға арналмақ.

3-жүргізуші: Ерназ

Бүгінгі күн құшақтары гүлге толсын,

Дендеріңнің саулығы мықты болсын.

Білімімен суарған шәкірттерін

Төл мерекең ұстаздар құтты болсын.

3-жүргізуші: Ерназ

Ұстаз... Қандай қасиетті сөз! Әр адамның жүрегіне ерекше жылулық нұрын себетін аяулы тұлға бейнесімен өзектес ұғым. Ұстаз алдынан өтпейтін ешкім жоқ. Жүрексіз өмір болмаса, ұстазсыз білімнің, тәрбиенің де іске аспайтыны белгілі.

2-жүргізуші: Ділдә

Небір данышпан адамдар, қарапайым еңбеккерлер, тіпті арман қуған жеткіншектер де бәрі бір адамға қарыздар. Адам баласының жүрегінде қадір тұтып, құрметтейтін ұғым болса, ол- ұстаз.

1-жүргізуші: Арман

Ажырамай ұжымнан бір елі сіз,

Жақсылыққа жаралған жүрегіңіз.

Сөз берелік мектептің басшысына

Ұстаздарға арналсын тілегіңіз.

Мерекелік құттықтау сөз мектеп директоры Әлмағамбетов Гиваз Ақбайзенұлына беріледі.

Ән: «Ұстазым» Орындайтын: Нұрмұханбетова Гүлім

3-жүргізуші: Ерназ

Ұстаздар! Қандай ғажап халықсыздар!

Шәкіртке шыңдай биік алыпсыздар.

1-жүргізуші: Арман

Жан біткен жанарына нұр сыйлаған,

Күндей боп күлімдеген жарықсыздар

2-жүргізуші: Ділдә

Данышпан да, дана да оқып сенен,

Атақ- даңқын асырды бар әлемнен.

«Ұстаз» деген аяулы, асыл жанды

Жақсы көрем, арнаймын жақсы өлең.

Ән: «Ұстазым» Орындайтын: Аманғазина Жаннұр. Аяулы ұстаздар, сіздердің құрметтеріңізге арналады. Қабыл алыңыздар!

2-жүргізуші: Ділдә

• Достар, менің ойымша кез келген адам ұстаз бола алмайды, сендер білесіңдер ме, «ұстаздық ету- уақыт ұту емес, өзгенің бақытын аялау, өзінің уақытын аямау» деген екен ғұлама ағаларымыз.

3-жүргізуші: Ерназ

• Ия, Ділдә,тауып айтылған сөз екен. Алтын уақытын сарп қылып, ұстаздық еңбегін шыңдау барысында көмегін аямай, шәкірттерін білім нәрімен сусындатып, тәлім- тәрбие беріп, жақсы қасиеттерді бойына дарытып, адамгершілік рухта бағыт- бағдар беруде аяулы ұстаздарымыздың еңбегі ерен.

1-жүргізуші: Арман

Достар, мен сендермен толықтай келісемін. Ғылым иесі ғалым да, ел қорғаған батыр да, тілінен бал тамған ақын да, егін салған диқан да, мал бағып тер төккен шопан да бәрі- бәрі ұстаздан тәлім алған, сондықтан да ұстаздар әрдайым қасиетті тұлға ретінде ерекшеленеді.

3-жүргізуші: Ерназ

Олай болса, қадірлі ұстаздар! Келесі орындалар «Ата-әже»әні сіздер үшін. Қабыл алыңыздар. Орындайтын:Бертағина Назым

2-жүргізуші: Ділдә

Ұлылықтың ұйытқысынан жаралған,

Өнегеңнен барлық шәкірт нәр алған.

Шапағатты шуақ сепкен ұстаздар,

Өздеріңнен бастау алар бар арман.

3-жүргізуші: Ерназ

Сағыныш сазы толқытқан,

Арнамақ сөздің мәйегін.

Шәкірттерің оқытқан,

Келіп тұр жолдап сәлемін.

Құттықтау сөз шәкірт лебіздеріне беріледі.

Би «--------------» «Нарқыз» бишілер тобы

1-жүргізуші: Арман

• Ділдә, екеуміз ұстаздар туралы нақыл сөздер айтып жарысып көрсек қайтеді?

Әділ бағасын көрермендер берсін.

2-жүргізуші: Ділдә

• Келістік

Арман: Ал, ендеше баста.

Ділдә: «ұстаз болу- өз уақытын аямау, өзгенің бақытын аялау»

Арман: «ұстазға қарап шәкірт өседі»

Ділдә: «аспаз көрген ат таныр, ұстаз көрген хат таныр»

Арман: «ұстазыңды ұлы әкеңдей сыйла»

Ділдә: «ұстазы жақсының- ұстамы жақсы»

Арман: Ділдә, екеуміз ұстаз туралы қанша мақтау сөз айтсақ та, тауыса алмаспыз. Кезекті әсем әнге берейік.

Қымбатты ұстаздар, Қабдыхамитов Ерназдың орындауында «Үкілі қыз» әнін қабыл алыңыздар.

2-жүргізуші: Ділдә

Тұла бойың тұнған сабыр, кешірім,

Айқара аштың бізге білім есігін.

Өр тұлғаңды балап шыңға, ұстазым,

Мен өзіңе тәнті болсам несі мін?

3-жүргізуші: Ерназ

Бала елдің болашағы болғанда,

Зор пайданы тигізесің қоғамға.

Мамандығың-кәсіптердің абзалы,

Адамдығың қымбат бізге одан да.

Күй: «Келіншек» орындайтын: Дүйсенова Еңлік

Нұрмұханбетов Арман

2-жүргізуші:Ділдә

Құрметті көрермендер, енді мектеп және ұстаздар өмірінен алынған әзілдерге кезек берейік.

(оқушылар шығады, әзіл және түсіндірме сөздік үшін)

1-жүргізуші:Арман

Мектеп- үйім, ұстаздарым- ата-анам,

Сенен өсіп, сенен ғана нәр алам.

Саяң ыстық, сен мәуелі бәйтерек,

Тамырлары сан тарапқа тараған.

2-жүргізуші:Ділдә

Аяулы ұстаздар! Ел ертеңі болып табылатын ұландардың бойына білім мен өнерді, адамгершілік пен адалдықты, туралық пен шыншылдықты, рухани байлық пен ұлттық қасиеттерді сіңіріп, оларды тұлғалық азамат етіп қалыптастыруда сіздердің қосқан үлестеріңіз зор.

3-жүргізуші:Ерназ

Олай болса, біздің ұстаздарымыз: (7 оқушы шығады, шарлармен әріптер жазылған)

М-мейірімді

Ұ-лағатты

Ғ-ғазиз

А-ақылды

Л-Лайықьы

І-іскер

М-маман

1-жүргізуші: Арман

Ашық болсын нұрға толы көгіміз,

Аман болсын еліміз бен жеріміз.

Аманаттап тапсырамыз тағдырды,

Анамыз деп қабылдадық сені біз.

2-жүргізуші: Ділдә

Ұстаздар жақсылықтың жол ашары,

Қолыңда шәкіртіңнің бала шағы.

Өмірді алға қарай өрлететін,

Сендерде Ұлы Отанның болашағы.

3-жүргізуші: Ерназ

Ұстаз сөзін айтып жүрдік ән қылып,

Одан басқа жүрген кім бар жанды ұғып.

Ұстаз деген- ұлылардың ұлысы,

Қасиетіңе бас иейік мәңгілік (Жүргізушілер бірге айтады)

Хор:

2-жүргізуші: Ділдә

Осымен Ұстаздар күніне арналған «ұстаз атың мәңгілік, жадымда қалар жаңғырып» атты 3 «ә» және 5 «а» сыныптары ұйымдастырған концерттік бағдарламасы аяқталды.

Арман: Ардақты да аяулы ұстаздар! Сіздерге тек қана денсаулық!

Ділдә: Мол табыс

Ерназ: Жемісті еңбек

Бірге: Шынайы бақыт тілейміз

Ділдә: Мерекелеріңіз

Бірге: Құтты болсын !!!

Соңы

Арман:Демеңіз біз өнерді аяп қапты,

Ділдә:Уақыт та біраз жерге таяп қапты.

Ерназ:Қош сау боп тұрыңыздар кездескенше

Бірге:Осымен концертіміз аяқталды.