Максат һәм бурычлар:
- Сәламәт яшәү турында сөйләшү.
- Чиста-пөхтә йөрү күнекмәләре үстерү.
- Үз сәламәтлегеңне кайгыртучанлык һәм чисталыкка омтылыш тәрбияләү.
- Сәламәтлекне саклау ысуллары белән таныштыру.
- Спортка уңай караш тәрбияләү.
Җиһазлау: компьютер, плакатлар, музыкаль бизәлеш, компьютер презентациясе
Метод: шәхескә юнәлтелгән күмәк-иҗади чара
Төре: җыен
Алымнар: әңгәмә, уеннар, практик күнекмәләр.
Җыен барышы:
Исәнмесез, кадерле укучылар! (СЛАЙД)
- Әйдәгез бергәләп ял итеп алыйк. Башта әйтегез: Нәрсәне сатып алып булмый? (Сәламәтлекне)
(Һәр кеше үзенчә уйлый. Кемгәдер берәр әйбер кадерле. Ә сез авырып киттегез ди. Сезнен бу хәлдә берәр эш эшлисегез киләме? )
Иң зур байлык нәрсә ул? (Сәламәтлек)
Димәк безнең тормышыбыз өчен иң кадерле нәрсә – ул сәламәтлек. Менә шуңа күрә бүгенге темабыз да сәламәтлек турында булыр. (СЛАЙД)
Бүген без "Сәламәтлек" иленә сәяхәткә китәрбез, дөрес һәм файдалы итеп яшәү турында сөйләшербез, күмәк уеннар уйнап, ялларны кызыклы итеп үткәрербез.
Сезгә сәяхәтнең картасы бирелер. Әлеге маршрут буенча китәрбез. (СЛАЙД)
- Әйдәгез юлга кузгалыйк. Җәяүләп чыгабызмы, әллә машиналарга утырыпмы? Кем нинди машинага утыра, әйтегез. Дөрес, укучылар, җәяүләп чыксак безнең сәламәтлегебез өчен файдалырак булыр? Ни өчен? (Чөнки без хәрәкәт итәбез һәм саф һава сулыйбыз. Ә бу сәламәтлек өчен бик файдалы.)
Әйдәгез, укучылар җәяүләп чыгыйк.
Мин сезгә: Кто шагает дружно в ряд?
Сез миңа: Самый лучший наш отряд дип әйтерсез
МУЗЫКА
Киттек. (Җәяүләп, бии-бии әйләнеп киләбез). Барыбыз да минем арттан, тезелешеп барабыз. (Музыка.)
- Бик яхшы! Менә без шулай матур гына юлга да кузгалдык.
СӘЛАМЛӘҮ. ИГЪТИБАРЛЫЛЫККА УЕН.
Беренче тукталыш “Исәнмесез – саумысез” дип атала. Бу тукталышта без “Исәнмесез - саумысез” уенын уйнарбыз.
“Исәнмесез - саумысез” уены
Түгәрәк ясап басабыз. Бик игътибарлы булыгыз. Сезгә мин әйткән сүзне кабатларга кирәк. Миннән уң яктагылар гел уң як иптәшенә әйтә, сул яктагылар гел сул якка әйтә. Сүзләр кире миңа килеп җитәргә тиеш. (Башта уң якка “Исәнмесез”, сул якка “Саумысез” дигән сүзләр әйтелә. Аннары уң якка “Ничек хәлләр?”, сул якка “Кәефләр шәпме?” сүзләре дә өстәлә.)
- ИСӘНМЕСЕЗ-САУМЫСЕЗ! НИЧЕК ХӘЛЛӘР? (Во!) КӘЕФЛӘР ШӘПМЕ? (Шәп!)
Алай булса, сәяхәтебезне дәвам итәбез һәм икенче тукталышка килеп җитәбез.
ВОЖАТЫЙ ӘҢГӘМӘСЕ. ПРАКТИК КҮНЕКМӘЛӘР.
Икенче тукталыш “Ашыгыч ярдәм” дип атала.
Элек-электән халыкта "Сәламәтлекне бернинди байлыкка да алмаштырып булмый” дигән әйтем бар. Димәк, кеше өчен сәламәтлек иң кирәк, иң кадерле нәрсә. Һәр кеше үз сәламәтлеген үзе кайгыртырта, яхшы кәеф белән йөрергә тырыша. Ләкин кайвакыт кеше авырып та китә.
- Әгәр дә кем дә булса авырып китсә яки кем дә булса җитди җәрәхәт алса нишләргә кирәк?
(“Ашыгыч ярдәм” машинасы чакырырга)
Әйе, сез “Ашыгыч ярдәм” машинасын ничек чакырырга икәнен беләсезме?
- Менә сезгә телефон, кем чакырып карый? (телефон макеты бирелә)
(Аңлатмыйбыз. Бер бала чакыра, дөрес чакыра алмаса, өйрәтәсе) (СЛАЙД)
- Башта телефон номерын җыябыз. Нинди номер? (103, 3-21-03, 112)
Һәм тактада курсәтелгәнчә тәртип белән әйтәбез. (СЛАЙД)
Исем, фамилия —> адрес —> ничә яшь —> сезнең кайсы җирегез авырта
(1-2 бала әйтеп карый)
“Ашыгыч ярдәм” машинасын сулыш алу авырлашканда, күп кан югалтканда, артык югары температура булганда, түзеп булмаслык баш авыртканда, көзән җыерганда, аңны югалтканда, эч авыртканда, йөрәк чәнчегәндә чакыралар. (СЛАЙД)
ТӨП ӨЛЕШ.
Әлеге тукталыш “Сәламәт булыйк!” дип атала.
-Укучылар, сәламәт булу өчен тагын ниләр эшләргә кирәклеген без өченче тукталышта белербез. (СЛАЙД)
Лото
Сезгә лото бирелә. Игътибар белән карагыз. Нәрсәләр күрәсез.
(Туклану продуктлары)
Бар файдалы ризыклар, бар сәламәтлек өчен зарарлы ризыклар. Файдасызларны алып куярга кирәк.
Яхшы. Димәк нинди нәтиҗә ясарга була?
- Әйе, укучылар, сәламәт булу өчен дөрес тукланырга, витаминнарга бай, файдалы ризыклар ашарга кирәк. Дөрес туклану – сәламәтлекнең нигезе.
- Сәламәт, матур, көчле, акыллы буласың килә икән хәрәкәтләнергә, йөгерергә дә кирәк. Ә сез, укучылар йөгерергә, велосипедта йөрергә яратасызмы? Биергә яратасызмы?
- Шуңа күрә әйдәгез физкультминутка уздырып алыйк. (“Я-Банан” видео)
- Банан ул туклану өчен файдалымы?
(Әйе, ул файдалы ризык булып санала. Анда калий бик күп, ди.) (СЛАЙД)
Лабиринт
- “Нәрсә ул начар һәм нәрсә ул яхшы?” уенын уйныйк. Төрле рәсемнәр бирелә. Ә сезгә нәрсәнең начар һәм нәрсәнең яхшы икәнен аңлатырга кирәк.
СЛАЙДЛАР бара. Балалар аңлаталар.
- Яхшы. Нинди нәтиҗә ясадыгыз?
Әйе, әгәр дә син рәсемнәрдә күренгәнчә тәртип турында уйламаучы, шапшак, әйләнә-тирәне пычратучы, гел телевизор караучы, озак вакыт компьютер уйнаучы бала булсаң, еш авыртачаксың.
- Андый булмау өчен нишләргә кирәк?
Көндәлек режимыңны булдырырга. (СЛАЙД)
КАРАР КАБУЛ ИТҮ.
- Димәк, буген без сәламәтлекне саклау буенча нинди кагыйдәләр чыгара алабыз? Сез нинди нәтиҗәләргә килдегез?
Сез үзегезнең дусларыгызга нинди киңәшләр бирер идегез?
1) Һәр көн билгеле бер сәгатьтә торырга һәм зарядка ясарга.
2) Иртән, көндез, кич, ашар алдыннан, йокыдан торгач һәм йокларга ятканчы юынырга.
3) Тырнакларын гел кисеп торырга.
4) Өс һәм аяк киемнәрен чиста тотарга.
5) Чәчне чиста йөртергә, көн саен тарарга, кыска итеп кистерергә яки матур итеп үреп куярга кирәк.
6) Дөрес итеп тукланырга.
УЕННАР, КҮҢЕЛ АЧУ.
ЙОМГАКЛАУ, САУБУЛЛАШУ.
- Хөрмәтле, балалар! Без дүртенче тукталышка килеп җиттек. Ул “Сәламәтлек ачкычы” дип атала. Менә сез сәламәт булу серләрен һәм кагыйдәләрен беләсез. Димәк, үзегезнең дусларыгызны да өйрәтә аласыз, шуңа күрә бүген сезгә сәламәтлек ачкычлары тапшырыла. Барыбыз да сәламәт булыйк! Әйдәгез саубуллашыйк. Түгәрәк ясап басабыз.
Миннән уң яктагылар гел уң як иптәшенә әйтә, сул яктагылар гел сул якка әйтә. (Уң якка “Сау бул!”, сул якка “Сәламәт бул!” дигән сүзләр әйтелә).
- Барыгыз да сау булыгыз! Сәламәт булыгыз! (СЛАЙД)
- Җәен футбол яратсагыз,
Кышын хоккей уйнагыз.
Хәрәкәтле уеннардан
Беркайчан да туймагыз. - Чаңгыда да шуыгыз сез,
Чабыгыз, узышыгыз.
Таза булгач, якты булыр
Киләчәк тормышыгыз. - Игътибарыгыз өчен рәхмәт!
