Конспект внеклассного мероприятия "Элифбе байрамы"

Элифбе байрамынынъ сценарийи

( байрам хайтармасы янъгъырай. Талебелер кирип отуралар.)

Йыр «Биз бахтияр балалар»

Етекчи. Урьметли мусафирлер, азиз балалар, хош кельдинъиз бизим байрамымызгъа.

Эр бир инсан мектепке баргъанда, биринджи китабы «Элифбе» ола.Биринджи окъув китабынъыз сизни тек окъумагъа дегиль, тербиели, интизамлы олмагъа, достлукъ ве бирликте яшамагъа огретти.

1. Бабам бугунь тюкяндан

Бир китап алып кельди.

Мына, огълум, Элифбе,

Окъу да огрен – деди.

2. Бабам айтты: «Элифбени

Мытлакъ огренмек керек.

Арифлер япкъан сёзлерин

Манасын бильмек керек».

3. Яныма достум кельди

Элифбени биз бакътыкъ

Экимиз де бегенип

Бабама «Сагъ ол!" – айттыкъ.

4. Мейдан мектеп азбарында

Келинъ достлар ойнайыкъ

Бу бахытлы яш чагъында

Ойнап кулип тояйыкъ.

Оюн « Балалар хайтармасы»

5. Сокъакъларны шенълендирип

Къувнакъ йырлар йырлайыкъ

Илим алып фен огренип,

Омрюмизни сырлайыкъ.

6. Яша Ватан, яша мектеп

Бизим тувгъан эвимиз

Осьтюресиз сиз айбетлеп

Сизни джандан севемиз.

Йыр «Къырым – меним анамдыр»

( Элифбе кирип келе)

Элифбе. Селям алейкум балалар, оджалар мусафирлер. Мени таныдынъызмы?

Балалар. Эльбет! Сен Элифбе!

Элифбе. Мен Элифбе. Мен сизге 1-инджи сентябрь куню кельдим ве сизлернен омюлик къаладжам. Мен сизлерге биринджи чанъны, биринджи окъув кунюни унуттырмам.

Мен Элифбе, Элифбе,

Окъумагъа огретем,

Эгер озю тырышса,

Китапны озю ачса,

Мени яхшы огренир.

Дюньяда не бар билир.

Эр бир суальге джевап,

Саифемде о тапар

Бугунь мен кельдим сизлерден хабер алмагъа. Мени яхшы огрендинъизми, янъы бир шейлер бильдинъизми? Къаны меним арифлерим акъкъында не билесинъиз?

7. Къырымтатар элифбесинде 37 ариф бар.

Он данеси созукъ:

8. Созукъ сеслер йырлайлар,

Баланы юкълаткъанда

Къычыра эм агълайлар,

Орманда адашкъанда.

Йигирми беш данеси тутукъ:

9. Тутукъ сеслер шытырдай

Сызгъыра эм шувулдай

Фысылдай эм инълей

Йырламагъа истемей

Эки ариф сес бильдирмей:

10. Йымшакълыкъ ишарети

Ич бир сесни бильдирмей

Амма, о да нафиле турмай

Элифбе сырасында

Онынъ бир вазифе

Тутукъларны йымшатмакъ.

11. Къаттылыкъ ишарети

Инатлыгъын косьтере

Кепкасы бар башында

Козырёгу артында.

Элифбе. Машалла сизлерге. Мен де бош эльнен кельмедим.мен сизлерге бахшышлар кетирдим. Бу меракълы китапларны сиз энди окъумагъа олурсынъыз.

Оджа. Сагъ ол, Элифбе . балалар да санъа чокъ шиирлер, оюн ве йырлар азырладылар. Шимди олардан бирини иджра этеджеклер.

( Оюн «Агъыр ава ве хайтарма)

12. Юдже султаным, дерде дерманым,

Бу тенде джаным окъумакъ истер.

13. Алимсин алим, билирсинъ алым,

Агъзымда тилим окъумакъ истер!

14. Догърудыр сёзюм, гедже-куньдюзим,

Шу эки козюм, окъумакъ истер!

15. Къашым-кулагъым, элим, аягъым,

Эки дудагъым окъумакъ истер!

16. Илим иле фен, идер гонълю шенъ,

Къадрини билен окъумакъ истер!

17. Шимди китап чокъ, окъумаян ёкъ,

Акъыллы чоджукъ окъумакъ истер!

Йыр «Алиме»

18. Мектеп – илим чокърагъы,

хазине-къазна

Элифбеден окъумакъ,

Язмакъ башлана.

19. Давет эте баланы

Тек догъру ёлгъа

Бильгиге анахтарны

Туттырып къолгъа.

20. Истер исенъ савап,

Чалыш огрен эсап.

Хазинедир китап,

Джаилликтир азап.

21. А-нен Б-ны бир ерге

Къошып тизем эджаны.

Эм де гъает тырышам,

Севиндирем оджамны.

( Оюн «Эски Къырым хайтармасы»)

Шиир «Окъумагъа огрендик»

22. Сеслерни догъру айтып

Арифлерни таныдыкъ

Эджалардан сёз япып

Окъумагъа башладыкъ.

23. Эм окъудыкъ, эм яздыкъ

Сёзлерден джумле яптыкъ

Джумлеге джумле къошып

Шиир , масал окъудыкъ.

24. Энди ана тилинде

Эм окъуп, эм язамыз.

Китаплардан эр шейни

Окъумагъа азырмыз.

Йыр «Мен лаф этем»

Шиир «Элифбе»

25. Бир чокъ язы А, Б, В, Г.

Бир чокътан-чокъ ресимлер.

Бу элифбе, бундан бильги

Ала бутюн несиллер.

26. «А»-нен, «Б»-нен башлай, билинъ

«Ана», «баба» сёзлери

Элифбеден башлай илим

Ача сокъур козьлерини.

27. Ватан сёзю В-нен башлай,

Сиз ватаннынъ ишанчы

Мектеп сизге бильги ашлай

Окъув, аят къуванчы.

28. «О»-нен башлай «оджа» сёзю

Сай, севинъиз оджаны.

О, огретир сизге озю

Эр арифни, эджаны.

29. «Я»-нен башлай «яхшы»,

«яман»,

Яманлыкъны бильменъиз

Эвде, ёлда сиз эр заман

Яхшы олып юрюнъиз.

30.Башы, сонъу элифбенинъ

Отуз еди арифтир,

Оны окъуп бильмегеннинъ

Омрю, куню гъариптир.

Йыр «Азбука»

Оюн «Вальс»

Элифбе. Балалар, мени севип окъугъанынъыз ичюн , сагъ олунъыз. Сагълыкънен къалынъыз.

Оджа. Азиз талебелер, мына биринджи окъув йылынъыз да екюнленди. Бу йыл девамында Элифбе сизлерни окъумагъа, язмагъа, интизамлы, тербиели олмагъа огретти.

Элифбени окъуп битирдинъиз, амма огюнъизде узун бильги ёлуна къапу ачылды. Энди сиз чешит тюрлю илим ве фенлерни огренмеге азырсынъыз.

Бу буюк къуванчнен мен сизни хайырлайым ве келеджекте муваффакъиетлер тилейим.

Оюн «Хоран»

Ана- бабалар комитети азаларына сёз бериле.

Сыныф реберине сёз бериле.

Мудир муавиниге сёз бериле.