?дептілік - т?рбие бастауы

Серикова Сәттігүл – «№10 жалпы білім беру орта мектебі» мемлекеттік мекемесінің бастауыш сынып мұғалімі. Жоғары білімді, екінші санатты мұғалім.Еңбек өтілі 12 жыл.

Сәттігүл Қошақанқызының жұмысындағы басты ерекшелік – балалардың өзін – өзі басқаруын қалыптастырып, олардың оқуға, дұрыс тәрбие алуға деген қызығушылығын арттыру

Тақырыбы: Әдептілік – тәрбие бастауы

Мақсаты::Оқушыларды қарапайымдылыққа, адамгершілікке, әдептілікке, кішіпейілдікке, өз халқының салт-дәстүрін үйрене отырып, жаман әдеттерден аулақ болуға үйрету.

1. Адам бойындағы ұнамды, ұнамсыз қылықтарды ажырата отырып, әдеп әліппесін бойына дарыту, тіл байлығын, таным белсенділігін арттыру.

2. Әдептілікке, сыпайылыққа тәрбиелеу.

Көрнекілігі: Суреттер, ұлағат сөздер, теңге-сұрақтар, бәйтерек суреті, жапырақтар.

Әдісі: Сайыс.

Кіріспе:

І. Қызығушылығын ояту          

Мұғалімнің сөзі:

- Балалар, бүгінгі ашық тәрбие сағатымыздың тақырыбы:

Кәне, бәріміз хормен оқып жіберейікші.

Әдептілік-тәрбие бастауы

Бүгінгі тәрбие сағатымыз сайыс түрінде өтеді. Ол үшін топқа бөлінейік.

3.Топқа бөлу:          1. Инабат тобы

   2. Қамқорлар тобы

3. Әдеп тобы

(Осы үш топқа сұрақтар таратылады. Сұрақтар топта талқыланады. Әр оқушы топ ішінде өз ойларын ортаға салады.)

Сұрақтар: 1.- Әдептілік дегенді қалай түсінесің?

2.- Әдепсіз дегенді қалай түсінесің?

3.- Әдептілікті бізге кім үйретеді?

(Тілші әр топтан сұраққа жауап алады.) -әр топтың делегат өкілі шығып қорғайды.  Әдептілік жайында мақал – мәтел айтып оқушы ойын қорытады.

Мұғалім:

Әдепті, ақылды балалар туралы өлеңдерді еске түсірейік.

(Кодоскоптан өлеңдерді көрсету). Оқушылар өздері білетін тақпақтарын айтады.

1-оқушы:

Кім үлкенді сыйласа,

Кім үлкенді тыңдаса.

Сыйлы болмақ, өзі де,

Үлкен болған кезінде.

(С.Мәуленов)

2-оқушы:

Әдептілік дегенің,

Әрқашанда керегің.

Әсемпаздық дегенің,

Әуре сарсаң әлегің.

(Е.Ерботин)

3-оқушы:

Сыйлап сәлем беремін,

Көршілерді көргенде.

Ізетті деп білемін,

Үйге қонақ келгенде.

Әдепсіз деп сөкпесін,

Анама айтып өкпесін.

(К.Байзақов)

4-оқушы:

Бала дана болады,

Даналықты көп көрсе,

Бала көктей солады.

           (Қ.Әбілдақызы)

5-оқушы:

Сыйла үлкен кісіні,

Қамқорлыққа ал кішіні.

Сақта көше тәртібін,

Бағдаршамның ал тілін.

Әдепті қыл бұл ісіңді,

Тазалап жүр тісіңді.

(Е.Өтетілеуов)

ІІ. Мағынаны ашу.

Ұлағатты сөздер.

(Әр топқа әр түсті қағазға жазылған мақалды 3 топқа тарату.)

1-топ

1. Аға әдепті болса, іні әдепті

Апа әдепті болса, сіңлі әдепті.

2.Мейірімділікті анадан үйрен,

Әдептілікті данадан үйрен.

2-топ

3.Әдепті бала- арлы бала,

Әдепсіз бала- сорлы бала.

4.Әдептілік ар- ұят,

Тұрпайы мінез тағы жат.

3-топ

5.Әдепті бала ата- анасын мақтатар,

Әдепсіз бала ата- анасын қақсатар.

6.Жақсы- көпке зейнет,

Жаман- көпке бейнет.

(Қазақ мақалдары)

(Осы айтылған мақалдарға байланысты әдептіліктің мәуелі бәйтерегін құрастырайық.

Әр топ жарыса отырып “әдептілік жапырақтарын” орналастырады.)

«Әдепті оқушы» көрінісі:

Рұқсат па? Кешіріңіз. Сәлеметсіз бе? –сөздерін қолдана отырып 3 топ «Әдепті оқушы» – деген тақырыпқа көрініс

құрап көрсетеді, талдайды.

 ІІІ. Ой толғаныс.                                               

(Тәрбие сағатымызды ойынмен жалғастырайық.)

1-ойын: “Теңге ілу”                  

1-теңге. Әдепті бала мен әдепсіз баланы салыстыр.

2-теңге. Әдепсіз балаға хат жазу.

3-теңге. Әдептілік туралы бес жолдық өлең (синкуейн)

2-ойын:  “Сөйлемді жалғастыр”

1. Үлкеннің – …………(тілін алу керек)

2. Сабақтан -…………(кешігуге болмайды)

3. Кішкене баланы -…….(жылатуға болмайды)

Мұғалім:

-         Бүгінгі тәрбие сағатынан не ұқтық, не білдік?

-         Әдепті бала кім? (осы сұрақтарға жауап бере отырып, тәрбие сағатын қорытындылайды.)

Қорытынды:

Мұғалім: Ғ.Мұстафин атамыз айтқандай: «Үлкеннің ақылын тыңдау, сөзге тоқтау инабаттылық көрінісі».

Ендеше,

1. Балалар, жақсыдан үйреніп, жаманнан жирене білейік.

2. Қоғамдағы ең жақсы адам- әдепті адам, әдепті адамдар- қоғамның баға жетпес байлығы, мәртебесі.

3. Әдептілік заңы салтанат құрған қоғамның абыройы  жоғары, тұрмысы сәнді, тіршілігі шуақты болмақ.