Сабақтың тақырыбы: «Астана - бас қала»
Сабақтың мақсаты:
Білімділігі: оқушыларды еліміздің астанасы Астана қаласымен және тарихымен таныстыру. Оқушының дүниетанымын Отанға, туған елге деген сүйіспеншілігін қалыптастыру.
Дамытушылығы: оқушылардың сөздік қорын, тілін және ойлау, көру сезіну, есте сақтау қабілеттерін дамыту.
Тәрбиелігі: елжандылыққа, туған жерін сүюге, түсінгенінен нәтиже шығара білуге тәрбиелеу.
Сабақтың түрі: саяхат сабағы
Әдіс - тәсілдері: түсіндіру, сұрақ - жауап
Сабақтың көрнекілігі: компьютер, видеопроектор, слайд, суреттер, сызбалар.
Сабақтың барысы:
1. Ұйымдастыру кезеңі
Оқушылардың назарын сабаққа аудару.
2. Ширату жаттығуы
"Қазына іздеу жолында" әдіс -тәсілі
Оқушылар айналып тұрып, Қазақстанның қалаларын кезекпен кезек айтып шығады. Осы қалалардың ішінен ең үлкен екі қаланы табады.
Астана – Алматы
"Анықта" әдіс -тәсілі. Картамен жұмыс. Қалаларды көрсету.
- Балалар Алматы туралы не білесіңдер?
Медеу мұз айдыны бар, үлкен оқу орындары, көптекен мәдени ескерткіштер, мұражайлар бар.
3. Жаңа сабақ.
Астана қаласының суреті
- Балалар, қазіргі біздің елордамыз қалай аталады екен?
- Астана
"1 минут " әдіс тәсілі. Астана туралы тоқтамай, қайталамай сөйлейді
- Астана туралы өлең, тақпақтар білесіңдер ме?.
1. Астанама қарашы,
Елімнің жас қаласы.
Неткен ұлы, неткен кең,
Қазағымның даласы!
2. Алтын күннің астында,
Желбірейді туымыз.
Қазақ деген халықтың,
Ұлы менен қызымыз.
3. Ардақталды Астанам,
Мәртебелі бас қалам.
Көркейе бер күн сайын,
Алға қарай, бас қадам.
- Тапсырманы жақсы орындадыңдар.
- Ендеше балалар, бүгінгі біздің тақырыбымыздың аты да Астана.
Сергіту сәті:
(Астананың көрінісі көрсетіледі)
"Хабарлама" әдіс -тәсілі арқылы қосымша мағлұмат беру.
Астана туралы мен сендерге түсіндіріп өтейін.
- Басын қар басқан Алатаудың етегінде орналасқан табиғатының сұлулығы жағынан сирек кездесетін Алматы қаласы ҚР - ның орталығы болуға лайық еді.
- Алайда, 1997 жылдың 20 - шы қазанында Елбасымыз Нұрсұлтан Әбішұлы Назарбаев «Ақмола» қаласын ҚР - ның астанасы деп жариялау туралы жарлыққа қол қойды.
- 1998 жылдың 6 - шы мамырында Елбасының Жарлығымен ҚР - ның астанасы - Астана қаласы болып аталды.
- Ал 20 - шы мамырда ҚР Астанасының мәртебесі туралы ҚР - ның заңы қабылданды.
- Осы жылы, яғни биыл 10 - шы маусымда Тәуелсіз Қазақстан жаңа астанасының салтанатты рәсімі болып өтті.
- Міне содан бері жылдан - жылға көркейіп бүкіл дүние жүзі таныған мемлекетіміздің мәйегі, дербестігіміздің дәйегі болған Елордамызды әрдайым мақтан тұтайық!
"Сен білесің бе?" әдіс -тәсілі Астананың көрікті жерлерін көрсету
- Астана Есілдің жағасында орналасқан
- ҚР Президентінің резиденциясы
- Парламент үйі
- Үкімет үйі
- Нұр - Астана мешіті бар.
7. Суретпен жұмыс (Бәйтеректің суреті)
- Балалар ненің суретін көріп тұрсыңдар?
- Бәйтерек туралы кім өлең, тақпақ біледі?
Оқушы:
- Ару қалам, Астанам!
Бой көтерген жас қалам.
Бәйтеректің биік шыңы,
Ерекше қой басқадан.
Оқушы:- Арайлы таң Астанам,
Тек өзіңмен мақтанам.
«Бәйтерек» пен «Ақорда»
Жас та болса, бас қалам.
- Мен енді сендерге «Бәйтерек» туралы түсіндіріп өтейін.
- «Бәйтерек» - Есілдің сол жағында бой көтерген алғашқы сәулет туындысы. Еңсесі биік, көркем «Бәйтерек» - бас қаламыздың символы.
Егемен мемлекетіміздің бойтұмары. Ескеркіштің биіктігі 97 метр.
"Есте сақта" әдіс -тәсілі
«Болашаққа бағдар: рухани жаңғыру» туралы түсінік
2017 жылдың сəуір айының 21-і күні Қазақстан Республикасы Президенті Н.Ə.Назарбаевтың «Болашаққа бағдар: рухани жаңғыру» атты мақаласы жарық көрді.
Н.Ә.Назарбаев бұл ретте, тұтас қоғамның және әрбір қазақстандықтың санасын жаңғыртудың бірнеше бағытына жеке-жеке тоқталады. Елбасы «Болашаққа бағдар: рухани жаңғыру» мақаласында таяу жылдардағы орындалатын мідеттерді атап көрсеткендей: 1. Қазақ тілін біртіндеп латын əліпбиіне көшіру жұмыстарын бастау; 2. «Жаңа гуманитарлық білім. Қазақ тіліндегі 100 жаңа оқулық» жобасы; 3. «Туған жер» бағдарламасы; 4. Қазақстанның қасиетті рухани құндылықтары немесе «Қазақстанның киелі жерлерінің географиясы»жобасы; 5. «Жаһандану замануи Қазақстандық мəдениет» жобасы; 6. «Қазақстандағы 100 Жаңа есім» жобасы. «Біздерге қазіргі заманғы жəне болашақты терең түсіне алатын білімді адамдар ауадай қажет» - деген болатын.
«Сананы жаңғыртудың» мазмұнын негіздей отырып, Президент жаңғырудың алты бағытын белгілейді:
1. Бәсекеге қабілеттілік;
2. Прагматизм;
3. Ұлттық бірегейлікті сақтау;
4. Білімнің салтанат құруы;
5. Қазақстанның революциялық емес, эволюциялық дамуы;
6. Сананың ашықтығы.
Ендеше, рухани жаңару арқылы әлем мойындар табысты ел болып, жарқын болашаққа деген сенім мен үмітті үндестіре отырып, баршамыз бірлік туы астында бақытқа бірге жетейік!
8. Сабақты бекіту "Венн" диаграммасы
- Сабағымызда Астана, Алматы деп жатырмыз.
- Ал, енді, балалар Венн диаграмасы арқылы осы екі қаланың ұқсастығын айырмашылығын, ортақ қасиетін табайық. (тақтаға плакат іліп, оқушылардың өздеріне орындату)
- Ал балалар Астана қаласының әсем жерлерін айтайықшы.
- Қандай әсем жерлері бар?
- Бәйтерек
- Нұр - Астана мешіті
- Есіл өзені
- Қазіргі Астана
- Ал, енді, осы сияқты Алматы қаласының да әсем жерлерін жазайық.
- Медеу мұз айдыны
- Апорт алмасы
- Алатау тауы
- Бұрынғы Астана
- Дұрыс, балалар.
- Енді осы екі, қаланың ортақ қасиеті не екен?
- Екеуі де әсем қала
- Екі қаланың да тарихы бір қала
Венн диаграммасы арқылы Астана мен Алматының айырмашылықтармен ұқсастықтарын көрсету.
9. Сабақты қорыту. "Өрмекші" әдісі
- Бүгін Отанымыздың бас қаласы Астана туралы толық білдік
- Өткен сабағымызда айтқандай өзіміздің туған жеріміз Қазақстаннан артық жер жоқ.
- Біздің Астанамыз 1998 жылы Астана қаласы болып аталса 2006 жылы Әнұранымыз да жаңарды. Әнұранды әрбір Қазақстанда тұратын Ұлттар жатқа білу керек. Біздің Астанамыз жайқалған жас қаламыз, ұрпақтан ұрпаққа аңыз болып айтылатын ардақты қала болсын!- дей келе сабағымызды Әнұранмен аяқтайық.
- Ал енді балалар сабағымыз аяқталды.
- Қонақтармен қоштасайық (орындарынан тұрып)
- Үлкенге де сіздер
Кішіге де сіздер
Құрметтейміз біздер!
- Сау болыңыздар!
