- Белгілі музыкатанушы, өнер ғылымының докторы, профессорБолат Сарыбаев қазақтың көне аспаптарын тек жинап, зерттеп қана қоймай, баға жетпес мәдени мұра болып есептелінетін қазақтың жиырмадан аса музыкалық аспаптарын біздерге ғасырлар қойнауынан жеткізіп, халық игілігіне айналдырды. 1982 жылғы 2 қазанда Н.Тілендиев атындағы академиялық фольклорлы-этнографиялық оркестрі дүниеге келіп, тұңғыш фольклорлық ансамбль құрды. Осыдан бастап Қазақстанда көптеген фольклорлық ансамбльдер пайда болды. Болат Сарыбаев осылай «Отырар сазы» фольклорлық – этнографиялық оркестрінің негізін қалады. Оркестрге домбыра, қобыз түрлерімен қатар, сазсырнай, жетіген, шертер, сыбызғы, шаңқобыз аспаптары енгізілді. Әсіресе, бұрын – соңды ансамбльдің құрамына енбеген мес қобызды қолдану жаңалық болды. Сонымен қатар ұрмалы-дауылпаз, асатаяқ, қоңырау, қайрақ секілді аспаптарды барынша пайдаланды. Белгілі композитор, оркестрдің алғашқы бас дирижеры, КСРО халық әртісі, Мемлекеттік сыйлықтың лауреаты, Халық Қаһарманы, белгілі қоғам қайраткері, Нұрғиса Тілендиев «Отырар сазы» оркестіріне арнайы шығармалар жазды. Әсіресе, композитордың «Ата толғауы» және «Әлқисса» күйлері халықтың ең сүйіп тыңдайтын шығармаларына айналды. Сөйтіп, қазақ музыка мәдениетінде фольклорлық – этнографиялық оркестр пайда болды. Бүгінде ұрпақтар сабақтастығын паш етіп, оркестрге Н.Тілендиевтің қызы - Динара Тілендиева жетекшілік етеді. Оркестр Қазақстанның қалаларында ғана емес, сонымен қатар алыс-жақын шет елдерде де концерттер берді. Атап айтқанда - Иракта, Мароккода, Вьетнамда, Солтүстік Кореяда, Германияда, Испанияда, Түркияда, Сауд Аравиясында, Иорданияда 1996 жылы «Отырар сазы» оркестрі Жамбыл атындағы халықаралық қор сыйлығының лауреаты болды.