С дыбысы (Ыс?ыры? дыбыстарды ?ою ж?не автоматтандыру)

Сабақтың тақырыбы: С дыбысы. (Ысқырық дыбыстарды қою және

автоматтандыру)

Сабақтың мақсаты: С дыбысын буында, сөзде, сөйлемде дұрыс айтуға машықтандыру, сөздерге дыбыстық талдау жасау, ашық буынды сөздерді оқу, сұраққа жауап беру арқылы сөйлем құрау.

Түзетулік мақсаты: С дыбысының артикуляциясының дұрыс қалпын бекіту, анық айтуға дағдыландыру. Фонематикалық есту қабілетін дамыта отырып, ұсақ моторикасын жетілдіру, сөйлеу кезіндегі дұрыс тыныс алуын қалыптастыру.

Сабақтың көрнекілігі: айна, кеспе суреттер, С фонемасының артикуляциялық кескіні, тілге арналған артикуляциялық жаттығулардың суреті, ойыншықтар т.б.

Сабақтың барысы: 1. Ұйымдастыру кезеңі.

Логопед: Біз қандаймыз?

Бала: Біз қандаймыз, қандаймыз,

Шұғылалы таңдаймыз.

Күлімдеген күндейміз,

Ережені ұмытпай,

Дұрыс анық дыбыстап,

Дыбыстарды ренжітпей,

Бәріміз дұрыс сөйлейміз,

Ренжуді білмейміз.

Логопед: Жарайсың.

2. Үй тапсырмасын сұрау.

С дыбысына қатысты өлең шумақтарын сұрау.

Сара келіп сабақтан,

Сан шаруа тындырды.

Самаурынға салатын,

Сексеуілді сындырды.

Сазан балық қуырды,

Сауды сары сиырды.

Сары ала қаз інінен,

Сығалайды сақтана.

Сұқтана оған үңілген,

Сұңқар отыр оқтана.

3. С дыбысының артикуляциясына тоқталу.

С дыбысын айтқанда ерін езу тартып, күлген кездегідей, тістер көрінеді.

- Тілдің ұшы төменгі тістердің түбіне тиеді.

- Тіл ортасы дөңестеніп, екі жағы астыңғы тістерге жанасады.

- Деміміз тіл ортасынан шығады.

- Жабық дауыс шымылдығының дірілінен С дыбысы шығады.

4. Тыныс алу жаттығуы. «Кімнің кемесі жақсы гулейді»

Балаға кішкене таза құтыға су құйып беру керек. Логопед өзіндегі құтыға үрлеп көрсетеді. Бала да солай үрлеп, дыбыстарды дыбыстайды.

5. С дыбысын буында, сөзде айтып дағдыландыру.

Сә-сә-сә сө-сө-сө сү-сү-сү се-се-се

әс-әс-әс өс-өс-өс үс-үс-үс ес-ес-ес

Логопед: Мен ақырын буындарды айтам, сен қатты дауыстап, анық айт.

Есе, өсе, өсу, есу, әсе.

Сән, сәкі, сәби, сәбіз, сәуір, сәске, сәнқой, сәукеле, сәуле, сәулетші

6. Фонематикалық дұрыс есту қабілеттерін жетілдіру.

Логопед: Сенің құлағың тыңдай біле ме?

Мен С дыбысына байланысты сөздер айтамын, сен С дыбысының сөз басында, ортасында, аяғында кездесуін айт.

Сағат, сана, сиыр, су, ас, астық, сандық, аласа, сыпырғы, шаңсорғыш, үстел, жасыл, сабақ, сусиыр, құс, сайқымазақ, астау, Астана, есік, Есіл т.б.

7. Ырғақты жаттығу.

Бойды бүкпей тік ұста

Жай сол қолды сол жаққа,

Жай оң қолды оң жаққа,

Осылай бір байқа да,

Он шақты рет қайтала.

8. «Сөз ойла, тез ойлан» ойыны.

9. Суретке қарап сөйлем құрау.

10. Сабақты қорытындылау.