Чачома мастором - сырнес ваязь ёнкс

Дубёнка велень средней школа.

Анокстызе ды ютавтызе

тиринь келень ды литературань

семинарсо Косолапова В. П.

Темась: « Чачома мастором – сырнес ваязь енкс»

Целесь: 1) келейгавтомс мокшэрзянь поэтнэдэ содамочинть, седее парсте А.М.Моронь творчестванзо;

2)домкасто невтемс сонзэ творчествасо лирикань жанрань форматнень сюпалгадоманть,тематикань неявикс келейгадоманть.

3)тонавтомс эйкакштнэнь ежомарязь кортамо ды ероковсто ловномо.

Кедьенкстнэ: литературной газета, эпиграф уроконтень, саевкст, книгань выставка,

магнитофон, словарь.

1Мон эрзян,

Прясто пильгс эрзян!

2Эряк, виемть ды каст,Россия,

Народот туртов покш часиякс.

Выставкась лемдязь: «Сырнень полкась те, конань лангс путыть пек мельстуиця

книгат.

Эпиграфось: «Эрзянь енкс, мокшэрзянь мастор,

Тон – монь чим ды авань лавсь…

А.М.Моро.

Валмеревкс: Родинанть эряви вечкемс, мазылгавтомс, ванстомс вейсэнь сюпавчинть.

-Шумбратадо,эйкакшт!Озадо!

Ушодсынек уроконть паро ежосо!

-Те урокстонть минь ютавттано устной журнал «Чачома мастором-сырнес ваязь

енкс» Карматано кортамо А.М.Моронь эрямонь ды творчествань кидензэ.Те аволь

васенцеде минь вастовтано поэтэнть марто поэзиянь нупальсэнть. Истя жо теевтяно содавиксэкс минек буень од сермадыцятненьстихест марто.

-Течинь уроконтень саинек эпиграфокс А. Моронь валтнэнь:

Эрзянь енкс, мокшэрзянь мастор,

Тон монь чим ды авань лавсь…

-Мезе арси евтамо неть валтнэсэ поэтэсь?

-Виде, поэтэсь кецни, што сон эри эрзянь масторсо, што эрямо тарказо прок

евксонь кондямо.

Тонавтницят:1 Шумбрачи, чачома енксонь мода!

Шумбрачи, эрзя-мокшонь народ!

2 Эсь Мордовиям вечкса мон,

Кода весе эсь Отчизнанть,

Кода тунда зорянь стямонть,

Кода минек сюпав кизэнть.

Устной журналось «Чачома мастором –сырнес ваязь енкс» ашти вете страницасто.

-Панжсынек васенце страницанть, сон алтави А.М.Моронь эрямонь ды творчествань кинтень. Лемдинек «Поэтэнть эйстэ вал»

-Васенце страницанть вети…

-Кода арсетядо, кодамо тематика саи поэтэсь сеедьстэ эсензэ стихотворениясо?

Тонавтыцясь: Виде, васняяк поэтэсь слави эрзянь народонть, евтни сонзэ вечкемадонзо Родинантень, тиринь чачома таркантень. Секскак омбоце стра-

ницась алтави Родинадо темантень ды лемдинек сонзэ «Эряк,виемть ды каст,

Россия!»

Теевтяно содавиксэкс поэтэнть «Россия, тиринем,Россия» стихенть марто.

Ловносы…

-1)Кодат мельть-арсемат ютасть пряванк стихенть кунсоломсто?

-2)Мезде кортави те стихсэнть?

-3)Кодамо ежо марто корты поэтэсь Россиядонть?

-4)Кода жо мертяно лиякс Россия валонтень?

-Россиясь- те минек Родинанок. Сон пек покш.

-5)А кода мерить республикантень, косо минь эрятано?

-Зярдо кортатано Россиядонть, мельсэ кирдтяно Мордовиянтькак секс, што сон

Россиянть пельксэзэ.

-Тонавтыцясь: А.М.Моро, эйкакшт, сюпалгавтызе мокшэрзянь литературанть паро

стихсэнзэ. Сынст ютксо и стихесь «Русь». Те стихесь ульнесь сермадозь войнань

иетнестэ, землянкасо, оймсема шкасто.

-Ловнови стихесь «Русь»

-Мезде евтни поэтэсь стихсэнть?

-Эрьва ломаненть, косо бу сон аволь эря, покш Родинадонзо башка, ули эйкакш

пингень родиназо, косо сон васенцеде стясь пильге лангс, тонадсь кортамо,эря-

монть лангс ваномо. Артур Матвеевич сеедьстэ васолесь эсензэ вишка пингень

таркатнес. А секс ли, поэтэнть кодамо стихензэ ды поэманзо иляк сае, свал марят

эйстэст тиринь масторонтень вечкема, од шкань ваньксчи.

-Кунсолосынек стихенть «Сех покш питне»

-Ловносы…

-Поэтэсь прок варштась те стихсэнть весе тиринь мазый таркатнева.

-Тонавтыцясь: Мезде кортыть валмеревкстнэ:

1) Тарадонь-тарадонь цела вирь синтреви,

Тенстесь жо киненьгак а синдеви.

2) Кие Родинанть вечксы, се ятонть виензэ нельгсы.

(ятонть-врагонть)

3) Родинанть эряви вечкемс, мазылгавтомс, ванстомс вейсэнь сюпавчинть.

-А кода?

-Виде. Бути теят паро, паро тевть, кандат лезэ аволь ансяк эстеть, но и лиянень-

гак.

-Панжсынек журналонь колмоце страницанть. Сонзэ лемдинек «Эрзянь валось».

-Тонавтниця: Чачома край. Сон крандаз чарокс,

Вели,вели-ве енов салы

Ютыя мон модань пель шаронть

Сех питнейкс теевсь эрзянь валось.

-Эрзя-мокшонь поэзияс А.М.Моро совась комсеце иетнестэ, зярдо ансяк-ансяк кар-

макшность таштавомо од литературань вийтне. 1925 иестэ, зярдо сонензэ ульнесть

16 иеть, печатазель рузонь кельсэ васенце стихезэ «Пиже тумо ало». Поэтэсь весе

Седейсэ кармась морамо од эрямонть. Весемезэ эсь пингензэ перть поэтэсь нолдась

стихень ды поэмань 22 книгат.

1929 иестэ А.Моронь зярыя стихензэ совасть «Васень сятктнес»- эрзянь писателень

ды поэтэнь васенце коллективной сборникентень. Те «Пекшень Дудкине», «Од

пора», «Од пинге», «Чинь валгома», «Мон-эрзян».

«Мон-эрзян» содавикс стихесь аволь сеске лацевсь истя, кодамокс те стихенть

содасынек. Лецтясынек сень, кона совась эрзя-мокшонь литературань историяс.

-Ловносы тенек…

-Те- аволь нусманя моро, аволь пеняцямо. Стихесь-героенть а пек шожда уцяскадо-

нзо поэтической евтнема, потмоежонь панжома. Меельце валтнэ – эсь народонть

олячис менемадонзо яволявтома.

-Евтасынек: те пек паро стихесь кандсь авторонтень аволь ансяк мельспаро.

Муевсть ломанть, кить лемдизь А.Моронь «националистэкс» ды те травамкась

кувать шкас педясь тензэ.

-1928 иестэ поэтэсь сермады «Од пора» стихенть. Нама, 19 иесэ кие карми сермадо-

мо сыречиде?

-Кунсолосынек стихенть…

-Мекс поэтэсь стихенть лемдизе «Од пора?» Кода арсетядо?

-Видеяк. Од порась – сехте мазый шка минек эрямосонть. Ды зяро бу тонь авольть

уле иеть, зярдояк а стувтови од шкась.

-Минь уш содатано, што Моро – те псевдоним. Алкуксонь фамилиязо Осипов.

Псевдонименть Моро саизе а стяко. Сон, алкукскак, теке моры, зярдо эсензэ

Стихсэнзэ слави эрзянь краенть, сонзэ ломантнень, мазый пертьпельксэнть. Самай

тень кисэ лемдизь Моронь мокшэрзянь краень морыцякс. Сонзэ «Русь», «Од пора»,

«Пекшень дудкине» стихензэ теевсть морокс, ютавтозельть ламо народонь кельт-

нес.

-Кунсолосынек моронть «Пекшень дудкине»

Ютатано седе тов. Нилеце страницанть лемдинек «Пейзажной лирика»

-Содатано, што пек покш тарка А.Моронь поэзиясо зани пейзажной лирикась

«Тундонь арсемат», «Васень лов», «А сорныть лопатне», «Сырнень сексь», «Сура

Чиресэ», «Килей» стихтнесэ максозь тиринь пертьпельксстэнть артовкст, конат-

нень вельде шнави мокшэрзятнень кенярдомань мелест.

-Артур Моро покш мельсэ корты васень ловдонть стихсэнть «Васень лов».

-Ловносы…

-Кунсолосынек, кода поэтэсь евтни сексень читнеде стихсэнть «Сексь»

1. Кодат ежомарямот раштасть поэтэнть седейсэ сексенть неемстэ?

2. Кодамо сексень порадо моли кортамось те стихсэнть?

- Ютыть чить, ковт, сась кежей телесь якшамонзо марто. Весе пертьпелксэсь

копачавсь ашо вельтямосо . Чувтнэяк вирьсэ аштить куманжава лов потсо.

Телень чись а пек эжди моданть. Лиясто маряви,што сон седеяк якшавты

сонзэ . Те иень шкантеньгак поэтэсь мусь паро, лембе валт.

- Кунсолосынек стихенть «Теле».

- Кода ловновить поэтэнть лирической стихотворениянзо?

- Панжсынек журналонь ветеце страницанть. Сонзэ лемдинек

« Гайги тондеть мором,

Тон – эрямонь рай»

- Те страницасонть карматано кортамо минек буень од ломантнень сермадомадост минек масторонть мазычиде, чачома велентень вечкемадо.

Те страницанть минь ушодсынек Анна Сульдинань стихсэнть «Ули мастор».Содатано, што Анна Сульдина минек буень Орданьбуе велень.

Ней эри Вильнюссо.

Макстано вал….

- Мезде кортави те стихотворениясонть?

- Эрзянь тиринь модадонть пек паро стихотворения сермадсь тынк оянк,

шабра велень тонавтницясь Волгушева Нина. Лемдизеяк стихенть «Эрзянь

модам».

- Макстано вал….

- А ней макстано вал Сергей Щанкиннэнь, сон евтни эсензэ вечкемадонзо тиринь минек велентень

- Вана и прядовсь минек урокось, конасонть минь кортынек Артур Моронь творчествадонзо, эрямодонзо, ловнынек сонзэ стихотворениянзо, конатнесэ кармавты минек вечкеме эсеть тиринь келенть, тиринь масторонть, видестэ кортамс эрзякс.

Ды минь неинек, што те кармавтомась топавтови, зярдо кунсолынек минек буень тонавтницянть стихотворениянзо.

- Сюкпря, эйкакшт, уроконть кисэ.

- Путан оценкат.

Мастором Монь!

Вечктян мон Тонь,

Вечксынь налксиця зорят,

Тонь валдо чить,

Тонь виде кить

Тонь ломанеть- азорот.