«Көз » ( 5 яшьлек балалар өчен комплекслы шөгыль үрнәге)

Конспект «Көз » ( 5 яшьлек балалар өчен комплекслы шөгыль үрнәге)

Максат: балаларга көз турында гомүми мәгълүмәт бирү.

Тәрбия бурычы: табигать матурлыгына соклана белү хисләре тәрбияләү. 

Үстерү бурычы: сөйләм телен үстерү эшен дәвам итү; буяулар белән эшләгәндә пөхтәлеккә ирешү.

Белем бирү бурычы: монологик һәм диалогик сөйләмнең гади төрләренә өйрәнү; сүзле уеннардан киң файдалану, сүз байлыгын арттыру һәм активлаштыру.

Белем бирү өлкәләре: коммуникация, танып белү, социальләштерү.

Методик алымнар һәм чаралар: күзәтү, сүзле уен, әңгәмә, сорауларга җавап.

Җиһазлау:  төрле агач рәсемнәре ( каен, өрәңге, усак,имән,миләш), көзге агач яфраклары.

Кулланылган әдәбият: “Туган телдә сөйләшәбез” (методик әсбап),

З.М. Зарипова, Р.С. Исаева “Үстерелешле уеннар”.

Л.Г. Гыйләҗева “Татар телендә сөйләм үстерү”.

 Эшчәнлек барышы:

Табышмак һәм сорауларга җавапларын әйтергә кушу.

Тәрбияче:

Кырлар буш кала,

Яңгырлар ява;

Җирләр дымлана,

Бу кайчак була? / Г.Тукай/

Балалар: - Көз.

Тәрбияче:

- Балалар, нинди көз айларын беләсез?

Балалар:

- Сентябрь, октябрь,ноябрь

Тәрбияче:

-Бик дөрес, булдырдыгыз.

1 бала:

Көз килде. Үләннәр

Саргайды, шиңде

Сап-сары яфраклар

Җиргә сибелде....

2 бала:

Үтте-китте матур җәйләр,

Көзләр килеп җиттеләр.

Ак каенның яфраклары

Саргаешып киптеләр.(К. Нәҗми).

Тәрбияче: Балалар, нинди көз билгеләрен беләсез?

( Балалар көз билгеләрен саныйлар)

Тәрбияче:

• Көз көне җил исә, яфраклар коела, яңгырлар ява, уңыш җыела һ.б.

• Ә хэзер без сезнең бер уен уйнап алырбыз. Ул “ Күңелле туп” дип атала.

Бу көзге тылсымлы туп,

Сезнең кулларга сикерер.

Җөмләнең башын әйтер,

Калганын әйтеп бетер.

Дөрес җавапка яфраклар бүләк итәрмен.

• Көз көне яфраклар нишли? (Көз көне яфраклар коела...)

• Көз көне яңгыр нишли? (Көз көне яңгыр еш ява...)

• Көз көне кошлар нишли? (Көз көне кошлар җылы якка очалар...)

• Көз көне агачлар нишли? (Көз көне агачлар яфракларын коялар...)

• Хайваннар көз көне нишли? (Хайваннар көз көне кышка әзерләнә...)

Уен «Көзге яфраклар».

Тәрбияче: Әйдәгез, балалар, бу көзге яфраклар белән уйнап алыйк.

Җил көчәя,җил исә, (баш очында яфракларны селкетәләр)

Яфракларны селкетә.

Яфраклар-яфраклар (яфраклар белән әйләнәләр)

Сары- матур яфраклар

Качтым яфрак астына, (чүгәләп, яфрак белән битләрен каплыйлар)

Карап алдым чак кына. (карап алалар)

Яфраклар-яфраклар (яфраклар белән әйләнәләр)

Сары- матур яфраклар (карап алалар)

Яфракларны бирмибез (яфракларны артка яшерәләр)

Кирәк булырлар дибез.

Яфраклар-яфраклар (яфраклар белән әйләнәләр)

Сары- матур яфраклар.

( Балалар белән төрле агач яфракларын тиешле агачы янына кую: каен яфрагын каен агачы рәсеменә, усакны , усак агачына һ.б.)

Тәрбияче:

• Ә хәзер, без сезнең белән, көзге яфракларны төшерербез. Моның өчен безгә бер яфрак кирәк була. Һәрберегез үзегезгә ошаган яфракны сайлап ала, аны ак кәгазь өстендә көзге яфрак төсенә буйый, яфракны буялган ягы белән альбом битенә тошерә.

Балалар эшеннән күргәзмә ясала.