"Бақытты балалық шақ" атты шығармашылық есеп беру концерттік бағдарламасы туралы

Ұлан ауданының Бозанбай ауылында көп жылдық үзілістен соң «Айгөлек» балабақшасы жұмыс істей бастаған болатын. 2016 жылдың қараша айының 26 күні балабақша 10 жылдық мерейтойын Тәуелсіздіктің 25 жылдығымен ұштастырып үлкен мерекелік бағдарлама өткізген болатын. Енді міне көктемнің шуақты күндерінің бірі - 2017 жылғы мамырдың 26 күні Бозанбай ауылдық Мәдениет үйінің сахнасында «Бақытты балалық шақ» атты шығармашылық есеп беру концертін өткізіп, Ұлан ауданының білім бөлімі мекемелерінің арасында алғашқылар болып, жаңа дәстүрге бастау салды десек артық айтқанымыз емес.

Концертке барлық бес топтың тәрбиеленушілері, ұжымның мүшелері толықтай қатысты. Ата-аналар тарапынан да көп көмек болды.

Бағдарлама кезеңдері мен концерттік номерлер бір-бірімен үлкен үйлесімділікпен ұштасып жатты. Бағдарламаны балабақша меңгерушісі М.А.Ержомарт салтанатты түрде ашты. Ұжым мүшелерінің орындауындағы флешмоб биін көрермендер ыстық ықыласпен қабылдады. Содан соң ең кішкентай тәрбиеленушілер «Балапан» екінші сәбилер тобы мен «Құлыншақ» ортаңғы тобының балалары «Әрқашан күн сөнбесін!» әнін екі тілде орындап жалғастырды. Есболқызы Айжан атты кішкентай ару ән айтқанда қол соқпаған көрермен қалмады. Оған «Құлыншақ» тобының бүлдіршіндерінің орындауындағы «Така, така» биін қосайық!

Дегенмен, концерттік бағдарлама негізінен «Айналайын» және «Болашақ» мектепалды даярлық топтары балаларының өнерлеріне сүйенді. «Болашақ» мектепалды даярлық тобының қыздары өте көңілді «Веснушки» биін билесе, жеке өнер көрсеткен балалар да болды: Қарқын Қайрат «Әке,ана» әнімен және Ержомарт Ерке «Көңілді күн» әнімен көрермендерді тәнті етті.

Сондай-ақ, «Айналайын» мектепалды даярлық тобының концерттік номерлеріне ерекше тоқталғым келеді. Көктемге салым өткізілген бақшаішілік «Айгөлек жұлдызы» өнер байқауының қатысушылары Жакабаев Бақдәулет, Шаттық Кәусар мен Жекебайұлы Төребай «Әнші болу арманым» әнін трио боп орындады. Қыздардың орындауында «Көктем гүлі» биі биленді. Ұлдардың орындауындағы «Бабушки-старушки» биін тамашалаған кезде көрермендердің көңілдері бір серпіліп қалды! Сонымен қатар «Айналайын» тобының балалары топпен ағылшынша «Гуд монинг» және «Алтын бесік Айгөлек» атты әндерін орындады. Барлық балалардың өнерлеріне көрермендер қол соғып,зор қошеметпен қарсы алып отырды.

«Айгөлек» балабақшасы – өнер кеніші. Осындай өнерлі балалармен жұмыс істейтін ұжым мүшелері де өнердің қай түрінен болса кенде емес екендіктерін дәлелдеп берді. Мысалы: «МАИ» атты скетчте «жемқорлық» пен «парақорлық» сынды үлкен әлеуметтік мәселеге назар аударылса, «Попурри» биімен кең байтақ Қазақстанды мекен еткен қазақстан халқының береке-бірлігінің үлгісін көрсетті десек қателеспейміз.Күміс көмей әншілері қандай десеңізші! «Бөбектер» бірінші сәбилер тобының тәрбиешісі Жайлаухан Санақгүл «Балалық шаққа саяхат» және Қажымұрат Шешенқұлдың «Сені ғана» атты лирикалық әнін сызылта шырқады. «Айналайын» мектепалды даярлық тобының тәрбиешісі Ағзам Асима Ағзамқызы «И кто его знает» атты орыс халық әнімен көрермендерді ностальгияға жетелесе, «Немерем» атты З.Көпбосынұлының әнін айтқанда керісінше залдағы ата, апалардың көңілін бір серпіп тастады! Жаңылсын Дүйсен мен Уәли Уралбековтің баянда сүйемелдеп дуэт боп орындаған «Әке туралы жыр» әні талай көрерменнің көзіне жас үйіргені анық.

Вокалдық топтың орындауында жерлесіміз, Ұлан ауданының қадірлі азаматы болған С.Мұқановтың «Ұланым, менің Ұланым!» әні (жеке дауыста тәрбиешілер Ағзам А.А. және Семенова Г.С.) орындалды. Концерттік бағдарлама соңында ұжымдық хордың орындауында Р.Әлқожаның «Атамекен» әні шырқалды. Бұл ән шығармашылық есеп беру концертінің шымылдығын жапты.

Концерттік бағдарлама барысында зал көрермендерге толып кетті.Олардың көбі балабақша тәрбиеленушілерінің отбасынан екені сөзсіз.

Сондай-ақ, арнайы қонақтарымыз туралы айта кетейік. Ұлан ауданының әкімінің орынбасары Мамырбаева Роза Ұзаққызы құттықтау сөзінде шығармашылық есеп беру концертіне «аудан бойынша білім беру мекемелерінің арасында бірінші рет өткізіліп отырған іс-шара» деген баға берді. Содан соң балабақша тәрбиеленушілерін оқу жылы көлемінде қатысқан «Шабыт» және «New Opportunities» әдістемелік-білім беру орталықтары өткізген «Жер – біздің ортақ үйіміз», «Біз бейбітшілік үшін!» және «Наурыз – көктем және молшылық мерекесі» атты интернет байқаулардың нәтижелері бойынша қатысушылық сертификаттармен және түрлі деңгейдегі жүлдегерлерді дипломдармен марапаттады. Жүлдегерлерін жоғары деңгейде дайындаған бірнеше педагогты да арнайы дипломдармен және алғыс хаттармен марапаттады. Атап айтатын болсақ, олар: балабақша меңгерушісі М.А.Ержомарт, «Айналайын» мектепалды даярлық тобының тәрбиешілері Ағзам А.А. мен Жанарбек Г., «Құлыншақ» ортаңғы тобының тәрбиешілері Семенова Г.С. мен Жиналыс Р.

Ұлан аудандық Ішкі саясат бөлімінің маманы Лутфуллин З.А. да шығармашылық есеп беру концертіне оң баға берді.

Бозанбай ауылдық округінің әкімінің міндетін атқарушы Р.Т. Мукашева «Айгөлек» балабақшасының ұжымына округтің мәдени өміріне қосқан үлесі үшін арнайы алғыс хат табыс етті.

«Айгөлек» ұжымына ауылдастар атынан және ата-аналар атынан ризашылық білдіру мүмкіндігі жастарға тиген еді. С.Мұқашев атындағы Бозанбай ауылдық Мәдениет үйінің көркемдік жетекшісі Қапақ Нұрқуаныш «Айгөлек» балабақшасының есеп беру концертін ерекше мақтап, «Құсни сұлу» атты ән жолдады. Сонымен қатар, Абдрахманов Қ. балабақша ұжымының өнерлеріне тамсанып, өз тарапынан өнерлі жас ата-ананың бірі ретінде заманауи ән сыйлады.

Жоғарыда аталған конкурстарға балаларының қатысуына демеушілік еткен ата-аналарға және де концертке келген барлық ауылдастарына балабақша ұжымы алғыс білдіреді. Жаңа леп жаңа дәстүрге айналсын!

Бозанбай ауылдық Мәдениет үйінің әдіскері Қалиасқарова Г.Т.