Лингвокультурологический аспект понятия «число» в казахском и английском языках

Қазақ және ағылшын лингвомәдениетіндегі "сан" концептісі.

Еліміз егемендік алған соң қоғам өмірінің барлық саласында көптеген өзгерістер орын алғаны мәлім. Солардың бірі халықаралық қатынастар шеңберінің ұлғаюымен байланысты мәдениаралық қатысымның да рөлінің күшейе түсуі болып табылады. Сондай-ақ қатысымның әр түрлі ұлт өкілдері арасында болатын қарым-қатынастың табысты түрде өтуі, шығармашылық, іскерлік қатынастардың нәтижелі болуы, сөз, ең алдымен, коммуниканттардың бір-бірінің мәдениетінде қабылданған мінез-құлық нормалары мен тілдік санасында қалыптасқан айшықты сөз орамдарын өз прагматикалық діттеміне сай дұрыс таңдай білуіне тікелей байланысты. Осы орайда әрбір тұлға өз әріптесінің когнитивтік санасындағы білім аясына сай, мазмұнды да мағыналы тілдік бірліктерді орынды қолдана білуінің, оның сөз саптауында коммуникацияның барлық талаптарының, сөз дұрыстығы, байлығы, мәнерлілігі, қисындылығы т.б. сияқты сөз сапаларының сақталуы айрықша мәнге ие болмақ. Әсіресе, тілдесімнің нәтижелілігі үшін әр түрлі тілдерде сөйлейтін коммуниканттардың қоршаған ортаны әр түрлі қабылдауы, олардың әдебиеті мен мәдениетіне, діні мен діліне қатысты айырмашылықтардың тілінде көрініс табуы қатысымның тиісті деңгейде өтуіне едәуір кедергі келтіруі мүмкін. Алайда мұндай келеңсіздікке жол бермеу үшін әр түрлі мәдениеттерде қалыптасқан құндылықтар жүйесін өзара салыстырып, әр ұлт үшін маңызы зор деген ұғымдардың тілдегі көрінісін салыстыра зерделеп, мәдени аралық қатысым талаптарына сай меңгеру қажеттілігі даусыз. Зерттеу тақырыбының өзектілігі, атап айтқанда, қазақ және ағылшын лингвомәдениетіндегі "сан" концептісін лингвокогнитивтік тұрғыдан зерделеу қажеттілігі осыдан көрінеді.