Методическая разработка Литературон ерыс «Ирон фарн»

Литературон ерыс «Ирон фарн»

Зарӕг «Мӕ Ирыстон»

1дзурӕг: Мӕ Ирыстон, дӕ нӕртон фарн мӕ уды,

Мӕ рухс бӕллиц, мӕ ныфсы хох ды дӕ,

Мӕ амонд мӕм дӕ урссӕр хӕхтӕй худы,

Зын радзурӕн-цы хӕрзтӕ мын фӕдӕ…

2дзурӕг: Алы аз дӕр 15 майы Ирыстон бӕрӕг кӕны стыр ӕмӕ зӕрдӕйӕн зынаргъ цы у, ахӕм бӕрӕгбон. Иннӕ адӕмты ӕхсӕн сӕрыстыр цӕмӕй стӕм, уыцы бӕрӕгбон. Ирон адӕм сӕ ирондзинад ӕмӕ сӕ кад цӕй руаджы сӕфын нӕ уадзынц, уыцы бӕрӕгбон «Ирон ӕвзаг ӕмӕ лит-йы бӕрӕгбон».

1 дзурӕг: Зӕрдӕйӕн у алцыдӕр Ирыстон

Алы райсом хӕхты ˈрдӕм мӕ каст

Рагбонты мӕ хистӕртӕй цы хъуыстон,

Иууылдӕр куыд разындысты раст!

2дзурӕг: Ирыстон… Ирон адӕймаг… Ирон ӕвзаг…

Ацы Стыр кадджын дзырдтӕн мах не ˈппӕт дӕр хъуамӕ аргъ кӕнын зонӕм ӕмӕ сӕ макуы рох кӕнӕм, сӕрыстыр сӕ уӕм. Махӕй алчидӕр хъуамӕ зона, чи уыдысты нӕ фыдӕлтӕ, кӕцӕй цӕуынц нӕ уидӕгтӕ, нӕ ирон адӕмы хорз миниуджытӕ. Нӕ рагфыдӕлтӕй нӕ фӕхицӕн кæнын чи нӕ уадзы, фӕлтӕрӕй фӕлтӕрмӕ нӕ чи бӕтты, уый у фыццаджыдӕр нӕ ирон ӕвзаг. Махӕй алкӕмӕн дӕр зынаргъ сты ирон аив дзырд, ирон намыс, ирон ӕгъдау.

1дзурӕг: Ӕвзаг у, нӕ фыдӕлтӕй нын чи баззад, ахӕм хӕзна. Ӕвзаджы, айдӕнӕй зынӕгау зынынц нӕ адӕмӕн сӕ цард, сӕ тох, сӕ зондахаст незамантӕй фӕстӕмӕ, сӕ истори, сӕ гуманизм. Уый у канд зӕронд заман ӕвдисӕг нӕ, фӕлӕ дзы зыны нӕ сомбоны цард дӕр.

2дзурӕг: Фыды зӕхх-Ирыстон… Нӕ эрӕйы фӕндзӕм ӕнусӕй фӕстӕмӕ хӕхбӕстӕ сси нӕ адӕмӕн сӕ фарны мӕсыг. Кавказы уынгӕг хӕхты цы ирӕттӕ ныффидар кодтой сӕхи фыдӕлтыккон фарны уагыл, уыдоны фӕлтӕртӕ абон дзурынц мадӕлон ирон ӕвзагыл. Стыр ахадындзинад ис аив дзырды, ирон арфӕйы дзырды адӕмы рӕзтӕн.

1дзурӕг: Ирон адӕмы хуыздӕр ӕмӕ фӕзминагдӕр миниуджытӕ ӕвдыст ӕрцыдысты нӕ символикӕйы – нӕ тырысайы: сырх, урс, бур.

Сырх – патриотизмы ӕмӕ сӕрибары нысан.

Урс – удварны сыгъдӕгдзинад.

Бур – фарны миниуджытӕ.

2 дзурӕг: Фӕрнджын у Ирыстон хъӕбатыр ӕмӕ намысджын фӕсивӕдӕй. Кӕд бирӕ зындзинад бавзӕрста Ирыстон, уӕддӕр ын Ирыстоны фӕсивӕд кӕддӕриддӕр уыдысты ныфс, кӕцытӕ фыдӕлты фарн сӕфын нӕ бауагътой ӕмӕ нӕ бауадздзысты, уыдон кӕддӕриддӕр уыдысты ӕмӕ уыдзысты иузӕрдион Фыдыбӕстӕйыл, райгуырӕн уӕзӕгыл.Уый æдзухдæр зæрдыл дарын хъæуы,- уæлдайдæр та кæстæр фæлтæрæн.

1 дзурӕг: Ирон æвзаджы хъысмæт дарддæр аразгæ у нæ кæстæр фæлтæрæй,уымæн æмæ йæ рæзт æмæ йæ цæрæнбон не взагæн уыдоны къухы ис.Мах иууылдæр хъуамæ архайæм ууыл,цæмæй нæ кæстæртæ рæсугъд,аив дзурой сæ мадæлон æвзагыл,май йæ рох кæной,сæрыстыр дзы уой.

2 дзурæг:Не скъолайы кæстæр фæлтæр уын ныртæккæ равдисдзысты ,куыд зынаргъ сын сты ирон аив дзырды зæлтæ æмæ уын бакæсдзысты æмдзæвгæтæ.Нæ жюрийы уæнгтæ та сын аргъ скæндзысты 5-гай баллты бæрæггæнæнтæм гæсгæ.

Ерысы архайджытæ дзурынц æмдзæвгæтæ.

1 дзурæг:Табуафси,нæ жæрийы уæнгтæ!Ныр та уын бар дæттæм балæвар кæнын нæ хуыздæр архайджытæн кады гæххæттæ.

Хонгæ кафт.

2 дзурæг:Кæронбæттæны мæ фæнды арфæ ракæнын Ирыстонæн,йæ адæмæн.Хуыцау ахæм арфæ ракæнæд, фæрнджын æмæ амондджын куыд уой ирон адæм ,нæ кæстæртæй та сæрыстыр куыд уæм!

1дзурӕг: Ууыл нӕ равдыст кӕронмӕ ӕрхӕццӕ. Стыр бузныг зӕгъӕм уеˈппӕтӕн дӕр, чи нӕм ӕрбацыд ӕмӕ нӕм чи байхъуыста, уыдонӕн. Нӕ зӕрдӕ уын зӕгъы ног ӕнтыстдзинӕдтӕ, ӕнӕниздзинад, бинонты амонд.

Чызджыты кафт.