Эссе "Мамандығым - мақтаным"

Мамандығым - мақтаным

Смагулова Айнр Талгатовна

«Адам жанын түсіне білу, оны зерттей білу - үлкен өнер»
З.Фрейд.

Әр адам баласы ес білген сәтінен бастап «Кім боламын?» деген ойдың жетегінде ой қозғап, жанына жақын, жүрегі қалаған мамандықты таңдаумен болады. Бір кездері менің де жанымды жегідей жеген осы бір сауал еді. Көп ойландым, көптеген мамандықтарды зерттеп, ата-анамның ақыл-кеңесіне жүгіндім. Ақыры бір шешімге келдім. Менің жүрек қалауым – психология әлемін таңдады, яғни жан туралы ғылымды жаныма жақын көрдім. «Мен бір жұмбақ адаммын, оны да ойла» деп, кемеңгер Абай бабамыз айтып кеткендей, әрбір тұлға тылсым дүние, жұмбақ әлем. Себебі әр адамның болмыс-бітімі тек тұлғаның өзіне ғана мәлім. Осы бір тылсым дүниені танып, әр тұлғаның жан-дүниесін түсініп, жүрегіне жол таба білу мен таңдаған ғажайып мамандықтың басты ерекшелігі десем артық айтпаған болар едім.

«Жан ғылымы» өзіндік бітімі бар ерекше сала. Қазақта «Тән ауруы жазылар, жан ауруы жазылмас» деген әдемі сөз бар. Осы бір сөздің астарына үңіліп қарасақ үлкен мән жатқанын көруге болады. Қазіргі таңда тән ауруын дәрігер емдесе, жан ауруының емін психолог мамандар таба алады. Әр адамға жеке көмек көрсетіп, ішкі жан дүниесін түсініп, психологиялық тұрғыда көмек қолын созу үшін, қолдағы дипломмен қатар, сапалы білім, саналы тәрбие, мамандыққа деген сүйіспеншілік пен қызығушылық, өз ісіне деген шеберлік болуы қажет. Әр адамға деген мейірімділік пен жылы шырай адамның жан дүниесіне шуақ сыйлап, ауыртпалықтан құтылуға басар алғашқы қадам іспеттес болады.

Психолог, ол кім? Психолог-өзінің білімі мен біліктілігіне сүйене отырып өзгелерді тығырықтан шығаруға көмектесетін  ізгі жан. Психолог – өзін терең  түсіне  жүріп, өзгелердің жан-дүниесін түсінуге, зерттеуге ұмтылатын зерттеуші. Психолог – жәрдемші, психолог – көмекші. Психолог өзгелердің жанын ауыртпайды, керісінше жан-дүниесі күйзеліске түскен жандарға өзінің психология әлемін шарлап, жанына дауа іздейді. Міне, осыншама жақсылық атаулыны жүрегіне, ақылына, санасына шоғырландыра алатын ізгі жан иесі психология мамандығын таңдауымның басты себептері осындай. Себебі мен адамдарға жақсылық жасағанды бар жан-дүниеммен қаладым.

Жақсы психолог болу үшін не қажет? Ең алдымен терең білім, еңбек, дәлдік, ұқыптылық, бастамашылдық, қойған мақсатына жетуге деген өз күшіне сенімділік. Бұл қасиеттер кез-келген мамандық иесіне тән емес пе? Әрине солай. Ал, психолог мамандығы бұдан да гөрі зор  қасиеттерді талап ететінін еңбек ету барысында сезініп, білудемін. Ең маңызды қасиет ол мәселені шығармашылықпен шешетін терең интуицияның болуы. Психолог-басқа адамның мәселесіне еніп, түсіне отырып, өзі бірақ бұдан зардап шекпейтін мықты тұлға. Өз өмірін тәжірбие  ретінде қолданбайтын, әр нәрсеге обьективті түрде қарай алатын, өзгелермен бірге қуана да, қайғыра да алатын терең эмоционалды, жоғарыда айтқандай бірақ өзі бұдан зардап шекпейтін жан. Қазір мен колледжде психолог бола жүріп, әрбір күн сайын , кездесетін қиыншылықтар мен проблемалармен бетпе-бет кездесіп өз білімімді шыңдау, іздену үстіндемін. Бұл мен үшін психология мектебі.

Қоғам дамуының қозғаушы күші – адам. Яғни қоғамдағы жетістіктер бірінші кезекте адамдардың интеллектуалдық белсенділігіне байланысты, тәуелді. Сол үшін де осы жаһандану дәуірінде бәсекелестікке шыдай алатын, өз мамандығын жетік меңгерген, бастаған ісін орындауға табандылық көрсете алатын, мемлекеттің тірегі бола алатындай тұлғаларды қалыптастыру оқу орындарының алдына қойған басты міндеттерінің бірі болып отыр.Экономиканың, ғылым мен техниканың, ақпараттық технологияның даму қарқыны адам тәрбиесін қадағалау, реттеу, жүйелей басқару мәселесінде көптеген қиындықтар туғызуда.Осындай жағдайда психолог мамандардың жауапкершілігі бірнеше еселеп өсетінідігі айтпаса да түсінікті.Мен жұмыс барысында  көптеген  психолог – ғалымдардың, ойшылдардың  еңбектерімен танысып, халқымыздың ұлттық тәрбиесі негіздерінде бүгінгі психологтар қажетіне жаратар көп қазына бар екендігіне көзім жетті. Шығыстың аристотелі атанған ұлы бабамыз Әл – Фараби  «Тәрбиесіз берілген білім адамзаттың қас жауы» деп көрсеткен. Бала тәрбиелеу өте қиын, жауапкершілікті  үрдіс екені белгілі. Барлық ұстаз білім мен тәрбиені қатар алып жүруі керек. Бұл мақсатта әсіресе психолог мамандарға үлкен міндеттер жүктелген.  «Ағаш түзу өсу үшін оған көшет кезінде көмектесуге болады, ал үлкен ағаш болғанда оны түзете алмайсың» деген халық сөзіне сүйене отырып, әрбір оқушыны жеке тұлға деп танып, ғылыми, рухани мұраларды игерген, шығармашылық ой – өрісі бар, компютерлік сауаттылығы мен ақпараттың мәдениеті қалыптасқан жастарды тәрбиелеу бүгінгі күннің ең негізгі мақсаттарының бірі деп ойлаймын.Психологиялық жұмыс- адам жанымен жұмыс, адам ойымен, жеке тұлғамен жұмыс.

Бүгінгі біздің қоғамда жаһандану үрдісімен келген қиыншылықтар көбейіп жатыр. Көгілдір экранды жаулап шетелдік фильмдер, түрлі діни бірлестіктер шетелдік арзанқол музыкасы т.б. жастарымызды улап жатқаны жасырын емес. Олардың бәрі жастардың көңіл- күйіне, психикасына әсер етуде. Бұндай келеңсіз істермен күрес жүргізу бірінші кезекте тұр. Мені қоғамдағы басты проблемалардың бірі – жасөспірімдер мәселесі қатты толғандырады. Олардың ішкі жан күйзелісін түсіне отырып, заманның індетіне айналған  «суицид» ауруымен күресіп, өскелең ұрпақты осы бір әбжыланның уытынан құтқарғым  келеді.

Соңғы кездерде психолог мамандығына қажеттілік көбірек туындап отыр. Бұл немен байланысты? Мұның себептері көп, көмекке жүгінген әр адамның-біреуі жалғыз және оның қайғысына ортақтасып, қуанышына бөлісетін ешкімі жоқ, енді біреуі шынындада көмекке зәру. Қалай болғандада психолог көмегіне адам жүгінді. , яғни себебі бар. Психологтың жұмысы осы себепті табу, онымен тіл табыса отырып жұмыс жасап, оны жою тәсілдерін қарастыру.

Халқымыздың  көне заманнан келе жатқан «Ұяда не көрсең, ұшқанда соны ілерсің»  деген даналық сөзін ұмытпауымыз керек.Баланың бақытты болуы, жақсы азамат болғаны, ең алдымен, ата – анаға байланысты. Бірақ ата –ананың бәрі бірдей ұстаз емес, бәрі бірдей психолог емес. Оның үстіне толық емес отбасылар,қараусыз балалар,ата-ана мейіріміне зәру балалар қоғамда көбейіп отыр.

Психолог маман  аса сезімтал, ерекше  жанашыр, мықты шыдамды болу арқылы  шәкіртінің сырына бойлай алады.  Айталық: Егер мен бір шәкіртімнің қатты жасық, жасқаншақ екенін анықтап шықсам, оны «шалқайғанға шалқай, ол атаңның ұлы емес, еңкейгенге еңкей, ол атаңның құлы емес» деген қағиданы санасына сіңіріп, оның ешкімнен кем емес екендігін, жұртпен бірдей екендігін  дәлелелдеп, жігерін ұштап, өзін-өзі тануына, қабілетін жетілдіруіне бар мүмкіндігімді жұмсаймын.

Егер бала өзімшіл, қызғаншақ болса, «кең болсаң кем болмайсың» деп, халқымыздың ұлттық тәрбиесі қонақжайлық, мәрттік, жомарттық жағдайларына қатысты қызықты әңгіме, жыр, қазақ би шешендерінің айтқандарын  баяндау арқылы оның көпшіл болуына жол ашамын.

Жантанушы ретінде толық адамға айналар тұлғаға жол көрсетер жан болғаныма  қуанамын.

Сондықтан мен өз мамандығымды қоғамға қажеттілігін сезіне отырып, ерекше жақсы көрем және жақсы психолог  болу үшін барлық ерік –жігерімді сарп етуге әзірмін.